Website banane se pehle yeh 7 sawaal poochiye
Kisi bhi developer se — hum se bhi. Jo in saat ka seedha jawab na de, wahan paisa mat lagaiye.
Website ka market Indore mein hi 3,000 se 80,000 tak hai, aur farak samajh nahi aata. Yeh saat sawaal poochne se zyada tar confusion khatam ho jaata hai.
1. Domain kiske naam pe register hoga?
Jawab "aapke naam pe" hona chahiye. Agar developer apne naam pe rakhta hai to aap phanse hue ho — renewal ke waqt jo bole, dena padega.
2. Ek saal baad kitna lagega?
Domain aur hosting ka renewal number abhi maangiye, likhit mein. Pehle saal free bolkar doosre saal 15,000 maangna purana khel hai.
3. Content aur photo kaun dega?
Zyada tar project isi pe atakte hain. Agar aapko dena hai to timeline aapke upar hai, aur yeh pehle se saaf hona chahiye.
4. Kitne revision included hain?
"Unlimited revision" ka matlab aksar "hum thak jaayenge to band kar denge" hota hai. Ek number maangiye.
5. Site khud edit kar sakta hoon?
Price ya photo badalne ke liye har baar developer ke paas jaana pade to woh site aapki nahi hai. Login aur ek chhota panel milna chahiye.
6. Mobile pe kitne second mein khulegi?
Unke banaye kisi site ka link maangiye aur PageSpeed Insights pe mobile score dekhiye. 90 ke aas paas achha hai. 40 ho to aage mat badhiye.
7. Delivery late hui to?
Ek tareekh aur late hone pe kya hoga — dono likhit mein. Jiske paas jawab nahi, uske paas process nahi.
Yeh sab khud karne ka time nahi?
Hum kar dete hain. 7 din, fixed price.